Татарстанда быел шикәр чөгендере уңышы узган елгы күрсәткечтән 31,7%ка артыграк

Республикада быел шикәр чөгендере уңышы узган елгы күрсәткечтән 31,7% ка артыграк. Татарстан Республикасы Авыл хуҗалыгы һәм азык-төлек министрлыгы белешмәләре буенча, 7 ноябрьгә республикада шикәр чөгендере 63,2 мең га яисә барлык мәйданның 99%ында җыелган. Җыелган уңыш 2 млн 774,4 мең тонна тәшкил итә, бу күрсәткеч узган ел 2 млн 131,7 мең тонна иде. «Республика буенча шикәр чөгендеренең уртача уңышы 438,9 ц/га тәшкил итә. Бу узган елгы күрсәткечтән 105,8 ц/га яисә 31,7% ка артыграк», – дип сөйләде Татарстан Республикасы Авыл хуҗалыгы һәм азык-төлек министрлыгының игенчелек тармакларын үстерү бүлеге башлыгы урынбасары Фәргать Зиннәтов. Агентлык эңгәмәдәше сүзләре буенча, әлеге культурадан иң югары уңдырышлылык Тәтеш районында күзәтелә – 532 ц/га, бу күрсәткеч буенча икенче урында Зәй районы – 516 ц/га, өченче урында Минзәлә районы – 506 ц/га. «Иң күп шикәр чөгендере Зәй районында җыелган – 481,8 мең тонна. Шикәр чөгендере буенча алдынгылар рәтендә шулай ук Буа һәм Сарман районнары, аларның күрсәткечләре – 359,8 мең тонна һәм 355,9 мең тонна», – диде Фәргать Зиннәтов. Россия Федерациясе Авыл хуҗалыгы министрлыгы мәгълүматы буенча, 6 ноябрьгә тулаем ил буенча шикәр чөгендере 1,07 млн га яисә 93,1% мәйданда чыгарылган (шул датага 2018 елда – 1,05 млн га). Татлы тамыр 49,5 млн тонна җыелган (2018 елда – 38,7 млн тонна), уңдырышлылык - 464,7 ц/га (2018 елда – 369,4 ц/га).