Зәйдә Гадәттән тыш хәлләр буенча комиссия утырышы узды

5 ноябрь көнне хакимиятнең зур залында район Башкарма комитеты җитәкчесе И.Ф. Хафизов рәислегендә Гадәттән тыш хәлләр буенча комиссия утырышы узды. Утырыш эшендә муниципаль район башлыгы урынбасары В. Г. Акатьев катнашты. Утырышны ачып, район Башкарма комитеты җитәкчесе Илнар Хафизов, салкыннар башланыр алдыннан халыкның янгын куркынычсызлыгын тәэмин итү буенча барлык кирәкле чараларны үткәрү мөһим, дип ассызыклады. Утырышта шулай ук гадәттән тыш хәлләр килеп чыккан очракта радиоэлемтә схемасын эшләү мәсьәләләре буенча фикер алыштылар, «торак-2019» операциясен үткәрү турында мәгълүмат тыңладылар, шулай ук авыл җирлекләрендә ирекле янгын дружиналарын оештыру мәсьәләсен дә күтәрделәр. Авыл җирлекләре башлыкларына торак йортларда янгыннарны кисәтү буенча халык белән аңлату эшләре алып барырга, асоциаль тормыш алып баручы затларга, ялгыз өлкән яшьтәге гражданнарга аерым игътибар бирергә кушылды. Патронаж учетта торучы күп балалы гаиләләрне контрольгә алырга, торак йортлар янында һәм бакча участокларында территорияләрне чүп-чардан, янучан калдыклардан чистарту эшен оештырырга кирәклеге турында тагын бер кат ассызыкланды. Моннан тыш, су башняларының һәм янгын гидрантларының тоткарлыксыз су алуны тәэмин итү торышын да тикшерергә кирәклеге искәртелде.Утырышка район Башкарма комитеты җитәкчесе Илнар Хафизов йомгак ясады.