Зәйдә өлкәннәр көненә багышланган бәйрәм концерты узды

Бүген, 1 октябрь көнне, «Энергетик» мәдәният сараенда Өлкәннәр көненә багышланган «Яраткан телетапшырулар битләре буйлап» дип исемләнгән бәйрәм концерты булып узды. Зәйлеләрне район Башкарма комитеты җитәкчесе Илнар Фәнил улы Хафизов котлады. Бүген залда күп еллар дәвамында шәһәр һәм район иминлеге өчен хезмәт куйган, аның үсешенә зур өлеш керткән кешеләр җыелган иде, - диде район Башкарма комитеты җитәкчесе, тантана сәбәпчеләренә мөрәҗәгать итеп. - Сез һәрвакыт балаларыгыз, оныкларыгыз өчен горурлык һәм терәк, хезмәттәшләрегез өчен үрнәк булдыгыз һәм булачаксыз. Шунысы куанычлы, күбегез лаеклы ялда булуга карамастан, күп чараларда актив катнашырга вакыт һәм көч табасыз. Концертта «Энергетик» мәдәният сараеның иҗат коллективлары, шулай ук Нина Шатрилова, Федор Куликов, балалар музыка мәктәбеннән «гармунчылар» дуэты, «Каприз» бию ансамбле катнашты. Артистларның чыгышы бәйрәмгә чын бүләк булды.