Зәй районында «Һөнәрләрнең күпкырлы дөньясы» дип исемләнгән һөнәри юнәлеш бирү сәгате узды

27 сентябрь көнне Зәй районы Үзәк китапханәсенең уку залында 2 нче мәктәпнең 7 нче сыйныф укучылары өчен «Һөнәрләрнең күпкырлы дөньясы» дип исемләнгән һөнәри юнәлеш бирү сәгате узды. Анда Зәй халык мәшгульлеге үзәге профконсультанты Ләйсән Баһаветдинова катнашты. Әлеге чараның максаты булып яшүсмерләрнең төрле һөнәрләр турында күзаллауларын киңәйтү, хезмәткә карата уңай мөнәсәбәт формалаштыру, укучыларны аңлы рәвештә һөнәр сайлауга, һөнәрләр турында мәгълүмат эзләргә этәрү торды. Һәр кешенең тормышында, мәктәпне тәмамлаганнан соң, үзенең киләчәге турында уйланырга мәҗбүр иткән бер мизгел барлыкка килә. Һөнәр сайлау мәсьәләсе дә иң мөһим мәсьәләләрнең берсе булып тора. Һөнәр сайлау дөрес булсын өчен, бүгенге көндә иң популяр һөнәрләрне, аның кешегә куйган таләпләрен белергә, үз-үзеңне өйрәнергә кирәк. Китапханәче Лилия Хафизова үз чыгышында шулай ук китапханәдә булган әлеге тема буенча әдәбият белән таныштырды. Профконсультант Зәй районының хезмәт базарында нинди һөнәрләргә кытлык барлыгы турында сөйләде. Иң популяр һөнәрләр арасында балалар IT–белгечләр, төзелеш белән бәйле эшче белгечлекләр, инженерлар, табиблар, шәфкать туташлары, укытучы һөнәрләрен атады. Катнашучылар “Һөнәрне ничек сайларга һәм ялгышмаска" дигән видеофильм карады. Аннан соң һөнәрләр белән танышу уен формасында барды. Балалар викторина сорауларына җавап бирде, мәкальләр һәм әйтемнәр конкурсында катнашты. Чара ахырында укучыларга актив катнашкан өчен сувенирлар тапшырылды.