Зәйдә хезмәт куркынычсызлыгына багышланган республика семинары узды

Сәнәгатьтә травма очракларын киметү өчен хезмәт куркынычсызлыгы белән идарә системасын стратегик рәвештә үстерү. Бүген Зәйдә хезмәт куркынычсызлыгына багышланган республика семинарында шуның турында сөйләштеләр. Чара Татарстан Республикасы хезмәт, халыкны эш белән тәэмин итү һәм социаль яклау министрлыгы инициативасы буенча, Зәй муниципаль районы Башкарма комитеты, Зәй халык мәшгульлеге үзәге һәм Квалификацияләрне үстерү төбәк агентлыгы белән берлектә уздырылды. Аның эшендә республиканың профильле ведомство вәкилләре, шәһәр һәм районның йөздән артык оешма-предприятиесы җитәкчеләре һәм хезмәт куркынычсызлыгы буенча белгечләре катнашты. Семинарда катнашучыларны район җитәкчелеге исеменнән Зәй шәһәре Башкарма комитеты җитәкчесе Антон Петров сәламләде. Ул районда хезмәт куркынычсызлыгы буенча координация советы эшчәнлеге турында сөйләде. Татарстанда хезмәт куркынычсызлыгы һәм шартлары белән Татарстан Республикасы хезмәт, халыкны эш белән тәэмин итү һәм социаль яклау министрлыгының профильле бүлеге җитәкчесе Алла Курзенева таныштырды. Семинар барышында сәнәгатьтә трамва очракларын киметү өчен кисәтү чараларын финанслау мәсьәләләре каралды. Катнашучыларга хезмәт куркынычсызлыгы буенча белгечләрнең квалификациясенә яңа таләпләр, моннан тыш, хезмәткәрләрне шәхси саклану чаралары, зарарсызландыру һәм юдырту катнашмалары белән тәэмин итүдәге яңалыклар турында сөйләделәр. Семинар кысаларында заманча шәхси саклану чаралары күргәзмәсе узды. Барлык катнашучыларга белешмә-методик материаллар таратылды.