Зәйдә гадәттән тыш хәлләрне кисәтү һәм бетерү, янгын куркынычсызлыгын тәэмин итү комиссиясе утырышы узды

Кичә хакимиятнең зур залында башкарма комитет җитәкчесе Илнар Хафизов рәислегендә районда гадәттән тыш хәлләрне кисәтү һәм бетерү, янгын куркынычсызлыгын тәэмин итү буенча комиссиянең утырышы узды. Анда гадәттән тыш хәлләр комиссиясе, янгын куркынычсызлыгы сагы әгъзалары, авыл җирлекләре башлыклары, шәһәр-районның оешма, учреждение вәкилләре катнашты. Янгын вакытында су ала торган чыганакларны көзге-кышкы чорда файдалана алырлык итеп әзерләүне оештыру максатында, предприятие җитәкчеләренә янгын гидрантларын, сулыкларны һәм объектларның эчке янгынга каршы суүткәргеч системаларын карап чыгарга, төзек булмаганнарын тәртипкә китерергә, ГОСТ таләпләренә туры китереп, аларга бару юлларын өйрәтә торган күрсәтмә такталар урнаштырырга кирәклеге тагын бер кат искәртелде.