Парк буйлап экскурсия

Шәһәребездә елның теләсә-кайсы фасылында халыкны үзенә җәлеп итә торган урыннар байтак. Шуларның берсе – Ринат Фәрдиев исемендәге ял паркы. Ул рәсми төстә 2005 елның 10 сентябрендә ачылды. Кайчандыр ташландык хәлдәге, әрәмә баскан елга буе танымаслык булып үзгәрде, бөтен стандартларга туры килә торган ял итү урынына әверелде. Шундый ял урыны булдыру турында зәйлеләр күптән хыялланды һәм ул тормышка ашты. Паркның файдалануга тапшырылуына 14 ел үтте, ә ул елдан-ел зурая, матурлана бара, халыкны да үзенә ныграк җәлеп итә. Паркта төшерелгән фотолар социаль челтәрләрдә бик күп лайклар җыя. 21 сентябрьдә музей хезмәткәрләре паркта 2нче мәктәпнең 5 класс укучылары белән тематик экскурсия үткәрделәр. Укучылар бу көнне паркның төзелү тарихы, биш күпере барлыгы турында белделәр, аның берничә зонасын карадылар. Сөйләшүләрдән аңлашылганча, балалар паркта гаиләләре, дуслары белән еш булалар икән. Интеллектуаль чара гармунлы скульптура композициясе янында тәмамланды. Балалар “Зәйнең күренекле шәхесләре” дип исемләнгән китап, шул китап аша Ринат Фәрдиевнең биографиясе, эшчәнлеге белән танышты. Күпләре китап турында беренче мәртәбә белде һәм ул аларда кызыксыну, анда кертелгән шәхесләр турында күбрәк беләсе килү теләген уятты. Бу исә бик яхшы.