Зәй шәһәрендә язучы, танылган дәүләт эшлеклесе Вәлиев Разил Исмәгыйль улы белән очрашу узды

Кичә Сөббух Рәфыйков исемендәге үзәк китапханәдә күренекле шагыйрь, драматург, язучы, дәүләт эшлеклесе, Габдулла Тукай исемендәге, Муса Җәлил исемендәге дәүләт, республика премияләре лауреаты, Россия Федерациясе һәм Татарстан Республикасының атказанган мәдәният хезмәткәре, тарих фәннәре кандидаты, Россия гуманитар фәннәр академиясе почетлы академигы, Татарстан язучылары берлеге әгъзасы, ел саен үткәрелә торган “Ел китабы” республика конкурсына нигез салучы Разил Исмәгыйль улы Вәлиев белән "Иҗади дәрткә, сәяси дәрманга ия шәхес” дип исемләнгән очрашу кичәсе үтте. Очрашуда аның шигырьләре, шигырьләренә язылган җырлар яңгырады. Аларны кичәдә катнашучылар күңеленә барып җитәрлек итеп китапханә, “Энергетик” мәдәният сарае хезмәткәрләре башкарды. Мәртәбәле кунакка багышланган чарада муниципаль район башлыгы Разиф Кәримов, аның урынбасары Валерий Акатьев, Башкарма комитет җитәкчесе Илнар Хафизов һәм башка рәсми затлар катнашты. Район башлыгы үзәк китапханәгә капиталь төзекләндерү үткәрүдә үзеннән зур өлеш керткәне өчен, Разил Вәлиевкә райондашлар исеменнән зур рәхмәт белдерде һәм Рәхмәт хаты тапшырды. Разил әфәнде очрашуда катнашучыларга үзенең тормыш юлы, иҗади эшчәнлеге, киләчәккә булган проектлары турында мавыктыргыч итеп сөйләде һәм чарада катнашучыларның күп санлы сорауларына җавап бирде. Разил Вәлиев кебек танылган шәхесләр белән очрашу зәйлеләрнең күңелендә озак сакланыр.