Җиңүчеләрне бүләкләделәр

Бүген Зәйдә “ЭкоЯз- 2019” бәйгесе җиңүчеләрен бүләкләделәр. Җиңүчеләргә дипломнар һәм бүләкләрне район башкарма комитеты җитәкчесе Илнар Хафизов белән Татарстан Республикасы Экология һәм табигый ресурслар министрлыгының Кама аръягы территориаль идарәсе башлыгы Алексей Лобанов тапшырды. Җиңүчеләр төрле номинацияләрдә билгеләнгән иде. "Иң яхшы балалар бакчасы” номинациясендә – “Кояшкай” балалар бакчасы, "Иң яхшы мәктәп” номинациясендә – 6нчы мәктәп, “Иң яхшы гаилә” номинациясендә – Царегородцевлар гаиләсе, “Иң яхшы предприятие” номинациясендә “Зәй шикәре” АҖ җиңүче дип табылды. Конкурсның максаты Татарстан Республикасы халкын табигатьне саклау акцияләрендә катнашуга җәлеп итү, муниципаль районнарда иҗтимагый экологик башлангычларны, актив гражданнарны ачыклау, халыкка экологик белем бирү, төбәктәге экологик проблемаларны чишү юлларын эзләүгә кызыксыну уяту, Татарстан Республикасының экологик хәрәкәтен оештыру, Татарстан Республикасы халкы арасында өмәләр һәм экологик юнәлештәге башка чаралар үткәрү буенча яңа традицияләр барлыкка килүгә ярдәм итүдән гыйбарәт. 2019 елда санитар икеайлык нәтиҗәләре буенча Зәй районы республикада 3нче урын алды. Бәйге шартлары буенча территорияләрне төзекләндерү, санкцияләнмәгән чүплекләрне юк итү, икенчел чималны җыю һәм башка шундый критерийларга игътибар ителде. Моның өчен район кече архитектура формалары булган балалар уен мәйданчыгы белән бүләкләнде. Ул Иске Зәй бистәсенең Яшьлек урамына куелды.