Виктор Хрулевның “Мин янә сезнең белән” дип аталган шәхси күргәзмәсе ачылды

13 сентябрьдә Зәй туган як тарихын өйрәнү музеенда гениаль пумала остасы - танылган рәссам Виктор Хрулев ТР Рәссамнар берлегенә керүенең 20 еллыгы уңаеннан “Мин янә сезнең белән” дип аталган шәхси күргәзмәсен оештырды. Бу көнне аның туган көне дә иде. Күргәзмәдә аның 27 картинасы урын алды. Рәссамның жанрлар диапазоны бик киң: пейзаж, натюрморт, портрет, композицияләр. Рәссам нинди генә жанрга мөрәҗәгать итсә дә, аның эшләре тирә-якны чагылдыруда төсләр диапозоны яктылыгы, матурлыгы белән аерылып тора. Күргәзмәне ачу тантанасына рәссамның хезмәттәшләре, якыннары, балалар сәнгать мәктәбендә шөгыльләнүчеләр, укытучылар һәм укучылар коллективы, шәһәребезнең 1нче мәктәбенең 6 «А» сыйныфы укучылары килде. Алар арасында РФ һәм ТР Рәссамнар берлеге әгъзасы Мадияр Хаҗиев, Александр Черный, ТР Рәссамнар берлеге әгъзасы Әбүзәр Габдрахманов, Сергей Дмитриев, Равил Әхәтов, Фазыл Шиапов, танылган зәйлеләр Анатолий Ефименко, Магомет Морзагов, Роза Илалтдинова һ.б.лар бар иде. Бу көнне музей залы картиналар буенча фикер алышулар, көлешү, соклану-гаҗәпләнүдән гөрләп торды. «Энергетик» Мәдәният сарае үзешчәннәре чыгышы кичәгә тагын да ямь өстәде. 10 сорауны үз эченә алган «Рәссам сере» уены катнашучыларны тагын да җанландырып җибәрде. Күргәзмәдә Васнецовның «Баһадирлар» дип исемләнгән картинасына натурщиклар сайлау һәм алардан композиция төзү иң якты кадрларның берсе булып тора. Чара барышында Виктор Хрулев нәни рәссамнар өчен мастер-класс оештырып, булачак эшен күрсәтте. Халык рәссамы Мадияр Хаҗиев чыгышында Зәйнең рәссамнарга бай булуын ассызыклады, Виктор Хрулёв белән Сергей Цыгановны танылган рәссамнар, шәһәр йөзе дип атады. Бу көнне рәссамга шактый бүләкләр, чәчәк бәйләмнәре бирделәр, изге теләкләр теләделәр. Рәссам үзе дә туган як тарихын өйрәнү музеена Владимир Малаховның портретын бүләк итте. Владимир Сергеевич Малахов күренекле туган як тарихын өйрәнүче иде. Бу очраклы түгел, чөнки рәссам үзе дә туган якны өйрәнә, тарихи үткәнебезне рәсемнәрендә чагылдыра. Бу күргәзмәнең истәлекле финалы булды.