Иң мөһиме – булдырмый калу!

1 сентябрьдән көзге-кышкы чор башлана, күпләр уйлавынча, янгыннар чыгу куркынычы да кими. Әмма, синоптикларның озакка сузылган “әбиләр чуагы” вәгъдә итүен исәпкә алсак, кипкән үлән, чүп-чар яндыру нәтиҗәсендә янгыннар чыгу куркынычы зур булып кала әле. Күпчелек очракта янгыннар килеп чыгуның беренче сәбәбе булып, ут белән саксыз эш итү, кешеләрнең гамьсезлеге һәм янгын куркынычсызлыгы таләпләрен үтәмәү тора. Кипкән, корыган үсемлекләрне максатчан яндыру (күп очракта авыл хуҗалыгында) урманнар, торфлы жирләр янып китүгә китерә, шуннан торак пунктларга күчәргә мөмкин. Менә шуларны исәпкә алып, район янгыннарны кисәтү һәм күзәтчелек эшчәнлеге бүлеге шәһәр-район халкына бу чорда бакча участокларында, каралты-кура тирәсендә чүп-чар һәм кипкән үлән яндырудан тыелып торырга киңәш итә. Шул ук вакытта торак пунктларның гомуми файдаланудагы җир территорияләрендә чүп яндыру, учак ягу катгый тыелуын истән чыгармаска кирәк. Әгәр инде җыелган чүп-чарны яндырырга уйлагансыз икән, бу эшне янгын куркынычсызлыгы таләпләренә туры китереп, 5 метр радиуста территорияне тиз кабынып китә торган материаллардан чистартып, тимер мичкәдә яки тирәнлеге 30 см булган чокырда, якындагы корылма, биналарга зыян килмәслек арада, су, беренчел янгын сүндерү чараларын тәэмин итеп, башкару кирәк. Ә иң идеаль вариант - чүп-чар, калдык- постыкларны мичтә яндыру. Саклык чараларын үтәү мөһим – территория чиста, кул астында янгын сүндергеч, мобиль элемтә чарасы булырга тиеш. Җилле һава шартлары торганда, янгыннарга каршы аерым режим кертелгән чорда учак ягу катгый тыела, яккан учакны һич кенә дә күзәтүчесез калдырырга ярамый. Шулай ук ут тергезгәндә янучан, тиз кабынып китә торган сыекчалар, шартлый торган һәм янганда агулы, бик көчле агулы матдәләр бүлеп чыгара торган материаллар куллану катгый тыела. Янып беткәннән соң учак урынын туфрак, ком белән күмәргә яки күп итеп су сибәргә кирәк. Янгын куркынычсызлыгы кагыйдәләрен саклау мал-мөлкәтнең иминлеген тәэмин итәргә, янгыннарны кисәтергә ярдәм итүен истән чыгармыйк. Янгыннардан саклау хезмәтен чакырту өчен телефон: 01, мобиль элемтә аша -101.