Зәй районы игенчеләренең авыр хезмәтенә карата табигать үз мәрхәмәтен белдерә

Район басуларында шикәр чөгендере казуның иң кызган чагы. Табигать үзе игенчеләрнең авыр хезмәтенә карата рәхмәтен белдерә, игелгән уңышны югалтуларсыз җыеп алу өчен көннәр җылы, уңайлы тора. Бүген кырларда 12 "Ропа" маркалы чөгендер җыю комбайны һәм 4 "Ропа-Маус"чөгендер төягече эшли. Барысы 9337 гектар татлы тамыр җыеп аласы бар. 9 сентябрьгә шикәр чөгендере 1685 га мәйданда казылган, бу планның 18% ын тәшкил итә. 77мең 871 тонна татлы тамыр җыелган, уртача уңыш гектарыннан 462 центнер тәшкил итә. Шикәр заводы 149мең 638 тонна чимал кабул итте, шуның 68 мең 709 тоннасы Зәй районы агрофирмаларыннан. Шикәр заводы тарафыннан 102 мең 632 тонна чикәр чөгендере эшкәртелгән, 11 мең 397 тонна шикәр комы алынган. Шикәрлелек-15,93% тәшкил итә.