Зәйдә Питрау бәйрәмен билгеләп үттеләр

Районыбызда яшәүче халыкларның уртак бәйрәменә әверелгән Питрау быел да Кашкатау итәгендә зур оешканлык, ныклы әзерлек белән, күпсанлы кунаклар катнашында чын халык бәйрәме буларак узды. Бәйрәмдә район башлыгы Разиф Кәримов, Россия Федерациясе Дәүләт Думасы депутаты Айрат Хәйруллин, Татарстан Республикасы керәшеннәр җәмгыяте рәисе Иван Егоров, Зәй округы буенча Татарстан Республикасы Дәүләт Советына депутатлыкка кандидат Николай Нефедов, күренекле якташыбыз Рабит Батулла, “Агрокөч-Төркем” АҖ е вәкилләре катнашты. Гадәттәгечә, һәр авыл җирлеге диярлек күргәзмә оештырды, аланда җырлы-биюле тамашалар күрсәтелде. Бәйрәмдә катнашучыларны Разиф Кәримов һәм Иван Егоров котладылар.Әйе, Питрау - җитди эшләргә керешер алдыннан бер ял итеп, көч туплап калу бәйрәме. Ул елдан-ел яңа бизәкләр белән тулылана, дуслык-туганлык җепләрен ныгыта бара. Бәйрәм сәхнәләрендә Зәй, республика районнары, Саратов өлкәсе керәшен фольклор коллективлары, “Бәрмәнчек” дәүләт җыр-бию ансамбле, якташыбыз Татарстанның халык артисты Виталий Агапов һәм аерым җырчылар чыгышы бер-берсен алыштырып кына торды. Мәйданның төрле урыннарында уен-ярышлар барды. Бәйрәмне танылган юмор остасы Җәвит Шакиров алып барды. Шулай ук быел беренче тапкыр балалар арасында “Керәшен җыру әйтә” дип аталган җырчылар конкурсы үтте. «Питрау чибәре» конкурсы да елдан-ел популярлаша бара. Конкурсның башта сайлап алу турлары үтте. ”Питрау чибәре” исемен Керәшен Мәлеменнән Лиана Прохорова яулады. Калган кызлар төрле номинацияләрдә бүләкләнде. Питрау батыры булып Ранис Гыйләҗетдинов калды.