ИНН алу өчен Татарстан күпфункцияле үзәкләренә 7 меңнән артык кеше мөрәҗәгать итте

Татарстан Республикасында КФҮ агымдагы ел башында салым органында исәпкә кую һәм салым түләүченең шәхси номерын бирү буенча хезмәт күрсәтә башлады. Беренче биш айда «Минем документлар» офисларына 7 меңнән артык гариза бирүче мөрәҗәгать иткән. Исегезгә төшерәбез, ИНН – Россия Федерациясендә салым түләүчеләрнең исәбен тәртипкә салучы санлы код. Ул РФ нең һәр гражданында булырга тиеш. Салым түләүченең номеры гомер буе даими булып кала. Ул паспорт алганда, яшәү урынын яки фамилиясен алыштырганда үзгәрә алмый. Физик затның ИННы -12 санның эзлеклелеге, аларның беренче дүртесе ИНН биргән салым органы коды булып тора, калган алтысы — салым түләүчеләрнең бердәм дәүләт реестры территориаль бүлегендә зат турындагы язманың тәртип номеры, соңгы 2 се — контроль сан. Физик затны исәпкә кую турында гаризаны Татарстанның теләсә кайсы күп функцияле үзәгендә бирергә мөмкин. Салым түләүченең үзе белән паспорты булу шарт. Гариза шулай ук нотариус раслаган ышаныч кәгазе нигезендә эш итүче салым түләүченең вәкаләтле вәкиле тарафыннан бирелергә мөмкин. КФҮтә ИННны югалткан, бозган яисә фамилияне алыштырганнан соң алырга була. Мөрәҗәгатьтән соң хезмәт күрсәтү вакыты билгеләнгән һәм 7 эш көненнән дә артмый. ИНН теркәү һәм бирү процедурасы үзе бушлай. ИНН кабат бирелгәндә генә 300 сум түләргә туры киләчәк (мәсәлән, югалткан очракта).