Зәй районында авыл җирлекләре башлыкларының чираттагы күчмә семинары узды

Бүген Югары Шепкә авыл җирлегендә район башлыгы урынбасары В.Г. Акатьев, район Башкарма комитеты җитәкчесе И.Ф. Хафизов һәм авыл җирлекләре башлыклары катнашында семинар узды. Пленар өлешкә кадәр семинарда катнашучылар авыл җирлегенең социаль-көнкүреш объектлары эше белән таныштылар: Югары Шепкә авылындагы балалар мәйданчыгын һәм зиратны карадылар, мәктәп һәм балалар бакчасында, М.М.Ахунов крестян- фермер хуҗалыгында булдылар. Имәнлебаш авылында исә кунаклар И.И. Әхмәтҗанова крестян- фермер хуҗалыгын, республика программасы буенча төзелгән кибетне карадылар, зиратның торышын бәяләделәр. Семинарның пленар өлеше авыл мәдәният йортында узды. Утырышта түбәндәге темаларга чыгышлар тыңланды: Югары Шепкә авыл җирлеге җирле үзидарә органнарының эше турында; 2018 елның 3 кварталы өчен аерым күрсәткечләр буенча авыл җирлекләре эшчәнлеген бәяләү анализы; 2017-2018 уку елы йомгаклары һәм авыл җирлекләре мәктәпләре һәм балалар бакчаларының 2018-2019 уку елына бурычлары турында; минифермалар төзү программасын үтәү буенча хисап; авыл җирлекләренең спартакиадада катнашуы турында; авыл җирлекләрендә торак-коммуналь хезмәтләр өчен җыемнар турында. Киңәшмәгә йомгак ясап, район Башкарма комитеты җитәкчесе Илнар Хафизов авыл җирлекләре башлыкларын көн тәртибендә каралган мәсьәләләр буенча эшне активлаштырырга чакырды. Район башлыклары алдына шулай ук шәхси ярдәмче хуҗалыклар, мини –фермалар һәм эре мөгезле терлекләр санын арттыру бурычы куелды.