Район башлыгы Разиф Кәримов авыл хуҗалыгындагы эшләрнең барышы белән танышты

Бүген район башлыгы Р.Г. Кәримов агрофирма җитәкчеләре, авыл хуҗалыгы һәм азык-төлек идарәсе белгечләре белән берлектә хуҗалыкларга чыгып, көзге культураларның торышы, туфрак эшкәртү, силос өчен кукуруз җыю һәм шикәр чөгендере казу барышы белән танышты. Аерым алганда, ул «Нива», «Тукай», «Ялкын», «Алга», «Шепкә», «Сәвәләй», «Маяк», «Родина» бүлекчәләре басуларында булды. Бүгенге көндә район буенча 16 чөгендер җыю комбайны, 4 төягеч эшли. Шикәр чөгендере 3300 га мәйданда казып алынган, бу планның 36% ын тәшкил итә. 135 630 тонна татлы тамыразык җыелган, уртача уңыш гектардан 411 центнер тәшкил итә. Туфракны төп эшкәртү эшләре дәвам итә, параллель рәвештә шикәр чөгендере мәйданнары өчен сөрү катламын тирәнәйтү бара. Кырларда 26 агрегат эшли. Рейд барышында Рәзиф Кәримов механизаторлар белән әңгәмә корды, аларның эш шартлары белән танышты. Рәзиф Кәримов шулай ук районның сөтчелек комплексларында да булды, анда авыл хуҗалыгы продукциясен җитештерү барышы белән танышты, берүк вакытта терлекчеләр белән аралашырга да өлгерде. Бүгенге көндә район буенча тәүлегенә 82 тонна сөт савыла, бер сыердан уртача савым 15,2 кг тәшкил итә. Район башлыгы терлекчеләр алдына - күрсәткечләрен яхшырту, механизаторлар алдына - урып – җыю темпларын арттыру бурычын куйды.