Зәй политехника көллияте студентлары автосессия тапшырдылар

Зәй политехника көллияте автодромында ел саен үткәрелә торган «Автосессия – 2018» машина йөртү осталыгы конкурсы узды. Ярышлар югары һәм урта уку йортлары студентлары арасында оештырыла. Тантаналы өлештә 13 конкурсантны Россия Эчке эшләр министрлыгының Зәй районы буенча бүлеге юл хәрәкәте куркынычсызлыгы бүлекчәсе өлкән инспекторы Рөстәм Биктаһиров һәм «Юл хәрәкәте куркынычсызлыгы» ДБУ җирле бүлекчәсе директоры Вадим Иванов сәламләде. Ярышларда катнашучылар ике конкурс этабын узды. Теоретик этапта юл хәрәкәте кагыйдәләрен белүләрен, ә практик өлештә автодромда автомобиль йөртү осталыгын күрсәттеләр. Иң яхшы күрсәткечләр беренче урынны алган Роман Хафизовта булды, Дмитрий Руди - икенче, Руслан Минеев өченче урынны алды. Аларга 20 сентябрьдә Казанда узачак республика “Автосессиясендә» катнашырга туры киләчәк.