Аксар авыл җирлегендә халык җыены

Район башлыгы Разиф Кәримов елына ике тапкыр халык җыеннары кысаларында авылларда яшәүчеләр белән очраша. Аксар авыл җирлеге җыены Иске Тәкмәк клубында узды. Район башлыгы очрашуга җыелган халыкны 2018нче елның беренче яртыеллыгына социаль- икътисади үсеш күрсәткечләре белән таныштырды, шәһәр һәм районда башкарылучы зур эшләр турында сөйләде. Аксар авыл җирлеге башлыгы Юрий Гыйльманов, үз чиратында, җирлек эшчәнлегенә кагылышлы мәгълүмат җиткерде. Очрашуда шулай ук авылда яшәүчеләрнең эшлекле активлыгын арттыру, хуҗалык итүнең кече формаларын үстерү, йорт хайваннары һәм кошлары арасында авырулар таралуны кисәтү буенча чыгышлар булды. Халыкны телефон һәм интернет челтәре аша кылынучы мошенниклык очраклары турында кисәттеләр. Очрашуда халык тормышын тәэмин итүче предприятие һәм оешмалар җитәкчеләре дә катнашты. Алар төп чара башланганчы да авыл халкының гозер- үтенечләрен тыңлады, ә очрашу ахырында сорауларга район башлыгы үзе һәм аның урынбасарлары җавап бирделәр. Шушындый ук халык җыеннары бүген Югары Шепкә, Сәвәләй, Якты күл, Югары Пәнәче һәм Бигеш авыл җирлекләрендә узды.