Зәйдә район җитәкчелегенең халык белән очрашулары башланды

Зәйдә район җитәкчелеге елына ике мәртәбә халык белән очрашып, социаль-икътисади үсеше нәтиҗәләре буенча хисап тота. Әлеге чара шәһәрдә яшәү урыны буенча очрашулар, авыл җирлекләрендә - халык җыеннары формасында уза. Беренче яртыеллык нәтиҗәләренә багышланган очрашуларның 1нчесе 4нче мәктәптә оештырылды. Бирегә шәһәрнең үзәк өлешендә яшәүчеләр җыелды. Очрашуның төп өлеше башланганчы зәйлеләр үзләрен борчыган сораулар белән төрле хезмәтләр күрсәтүче предприятие-оешма җитәкчеләренә мөрәҗәгат итү мөмкинлегенә ия булдылар. Очрашуда район башлыгы Разиф Кәримов, аның урынбасарлары Валерий Акатьев, Елена Недошивина, район һәм шәһәр башкарма комитетлары җитәкчеләре Илнар Хафизов һәм Сергей Максимов, шәһәр Советы депутатлары катнашты. Район башлыгы Разиф Кәримов җыелган халыкны 2018 елның беренче яртысына социаль-икътисади үсеше нәтиҗәләре белән таныштырды. Төп күрсәткечләр буенча уңай динамика саклана. Озатылган продукция күләме 16 миллиард 397 мең сум тәшкил итте. Бу узган елга карата 17 процентка күбрәк һәм республикада җиденче күрсәткеч. Район башлыгы шулай ук бюджетның керем өлеше тәэмин ителүен, кабул ителгән социаль йөкләмәләрнең тулысынча үтәлүен, икътисад структурасының үзгәрүенә карамастан, район өчен энергетика, машина төзелеше һәм авыл хуҗалыгы тармакларының төп юнәлешләр булып калуын билгеләп үтте. Шәһәр башкарма комитеты җитәкчесе Сергей Максимов төзекләндерү эшләре буенча хисап тотты. Аның чыгышын “Уңайлы йорт” торак милекчеләре ширкәте рәисе Василий Абрамов һәм “Зәй шәһәре торак-коммуналь хуҗалыгы идарәче компаниясе” ҖЧШ директоры Галина Камышова тулыландырды. “Роспотребнадзор”ның Зәй бүлеге башлыгы Ринат Насыйбуллин шәһәр-районда экологик хәл торышын бәян итте. Эчке эшләр бүлеге башлыгы Айдар Фәсхетдинов халыкны телефон һәм интернет челтәре аша кабатланып торучы мошенниклык очраклары турында кисәтеп, уяулыкка чакырды.