11 августта зәйлеләр Физкультурачылар көнен билгеләп үттеләр

“Энергия” стадионында оештырылган зур спорт бәйрәмендә предприятие-оешмалар, авыл җирлекләре, балалар-яшүсмерләр спорт мәктәпләрендә шөгыльләнүчеләр, мәктәпкәчә яшьтәге балалар катнашты. Тантанада катнашучыларны район башлыгы Разиф Кәримов тәбрикләде. -Россиядә, Татарстанда физик культура һәм спортны үстерүгә зур игътибар бирелә. Соңгы елда гына да илебездә илкүләм дәрәҗәдәге ярышларның узуы моны дәлилли. Зәй Кама аръягы шәһәрләре арасында спорт үсеше буенча аерым урын тота. Бездә теләгән кешегә физик культура һәм спорт белән шөгыльләнү өчен барлык мөмкинлекләр бар. Барыгызны да Физкультурачылар көне белән тәбрик итәм, сәламәт булыгыз, сәламәт яшәү рәвеше алып барыгыз, - диде ул чыгышында. Чыннан да, Зәйне сәламәт яшәү рәвешен алгы планга куйган физкультурачылар шәһәре дияргә нигез бар. Шәһәр-районыбызда физик культура һәм спорт белән шөгыльләнүчеләр 22490 кеше тәшкил итә. Бу – зәйлеләрнең 43,8 проценты. Балалар-яшүсмерләр клубларында спортның төрле төрләре белән 2000нән артык бала шөгыльләнә. Районда 193 спорт корылмасы исәпләнә. Алар –йөзү бассейны, ясалма материал белән ябылган футбол кырлы стадион, боз сарае, хоккей мәйданчыклары, спорт заллары.Универсаль спорт мәйданчыклары төзү республика программасы кысаларында 2013-2018 елларда шәһәр-район биләмәсендә 20 спорт мәйданчыгы төзелде, шуның 3се – авыл җирлекләрендә (Сәвәләй, Аксар, Чыбыклы). Районыбыз спортчылары республика һәм Россия күләмендәге ярышларда уңышлы чыгыш ясый. Быел ел башыннан алар тарафыннан төрле дәрәҗә ярышларда 64 - алтын, 48 - көмеш һәм 68 - бронза медаль яуланды. Зур җиңүләргә ирешкән кайбер спортчыларыбызның исемнәрен атау урынлы булыр. Алар – 2018 ел кышкы Олимпия уеннарының бронза призеры Анна Нечаевская, яшь хоккейчыларның “Алтын алка” клубы призына үткәрелгән республика финал ярышларында җиңү яулаган “Яшьлек-2007” хоккей командасы, җиңел атлетика буенча яшүсмерләр арасында узган Россия беренчелеге бронза призеры Кирилл Герасимов, көрәш буенча Россия беренчелеге җиңүчесе Альберт Сәхабиев һәм билбау көрәше буенча Россия беренчелегендә җиңү яулаган Ольга Романова. Тантанада районыбызда физик культура һәм сортны үстерүгә лаеклы өлеш кертүчеләргә дәүләт бүләкләре тапшырылды. Физик культура, спорт һәм туризм идарәсенең баш белгече Наталья Сапаева, “Зәй” балалар-яшүсмерләр спорт мәктәбе тренер-укытучысы Рамил Салихов, “Барс” балалар-яшүсмерләр спорт мәктәбенең баскетбол буенча тренер-укытучылары Гөлгаз Абдуллина һәм Елена Ибатуллинага “Физик культура һәм спорт отличнигы” билгесе тапшырылды. “Зәй” балалар-яшүсмерләр спорт мәктәбенең ирекле көрәш буенча тренер-укытучысы Илнур Хуҗин, “Барс” балалар- яшүсмерләр спорт мәктәбенең кадрлар буенча инспекторы Валентина Бушуева Татарстан Республикасы Спорт министрлыгы Мактау грамотасына ия булды. Спорт ветераннары Валерий Иванов һәм Николай Лебедевка Татарстан Республикасы Спорт министрлыгы Рәхмәт хаты, районыбызны да физик культура һәм спортны үстерүдәге уңышлары өчен бертөркем тренерлар һәм спортчыларга район башлыгы Мактау грамоталары һәм район башкарма комитеты җитәкчесе Рәхмәт хатлары тапшырылды. Соңгы берничә елда безнең тормышка ГТО комплексы нормативларын тапшыру әйләнеп кайтты. Ел дәвамындә бу юнәлештә максатчан эшл алып барыла. Спорт бәйрәмендә Павел Конюхов, Наилә Сөләйманова, Анатолий Гущин, Волковлар һәм Лариннар гаиләләренә ГТОның алтын билгеләре тапшырылды. Бу көнне стадионда футбол, пляж волейболы, шахмат, шашка, баскетбол, җиңел атлетика, мини футбол һәм башка төр ярышлар узды.