Татарстан Президенты Рөстәм Миңнеханов Зәйдә урып- җыю эшләренең барышы белән танышты

Бүген Зәйгә эшлекле сәфәр белән Татарстан Республикасы Президенты Рөстәм Миңнеханов килде. Республика башлыгының районга килүенең максаты – урып-җыю эшләре белән якыннан танышу. Президент район басуларын, урак барышын вертолеттан карап чыкканнан соң, “Зәй” агрофирмасы “Алга” бүлекчәсе арпа басуында оешма-предприятие, хуҗалык җитәкчеләре, авыл җирлекләре башлыклары, фермерлар белән очрашып, киңәшмә үткәрде. Киңәшмәдә ТР авыл хуҗалыгы һәм азык-төлек министры Марат Әхмәтов, инвестор Илшат Фәрдиев, республика фермерлар ассоциациясе рәисе Камияр Байтемиров, район башлыгы Разиф Кәримов, “Агрокөч” һәм “Агрокөч-Төркем” җитәкчелеге һәм белгечләре катнашты. Әлеге бүлекчәдә арпа – 1 мең, чөгендер – 700, кукуруз (орлыкка һәм силоска) 500 гектар мәйдан били. Киңәшмәнең биредә оештырылуы очраклы түгел, бу хуҗалыкта арпаның уңышы гектарыннан 48,7 центнер тәшкил итә. Шикәр чөгендеренең исә 350-400 грамм авырлыктагылары бар. Кукуруз басулары да сокланырлык: “Гитаго” сорты – силоска, “Краснодарский 194” сорты исә орлыкка дип игелгән. Президент арпа басуын карады, анда хезмәт куючы комбайнчылар, механизаторлар белән аралашты, туфрак әзерләүдә кулланыла торган яңа технологияләр белән танышты. Рөстәм Миңнеханов районда үсемлекчелек тармагындагы уңай үзгәрешләрне, җир эшкәртүгә фәнни яктан якын килеп эшләүне, яңа технологияләр гамәлгә ашырылуын билгеләп үтте, киләчәктә терлекчелек тармагында да күрсәткечләрнең арта баруына ышанычын белдерде.