Зәйдә күренекле мәгърифәтче, дин әһеле, табиб Таҗетдин Ялчыголны искә алдылар

Бүген Зәй районы Имәнлебаш авылында күренекле мәгърифәтче, дин әһеле, табиб Таҗетдин Ялчыгол истәлегенә багышланган чираттагы Ялчыгол укулары узды. Быел ул районда алтынчы мәртәбә оештырылды. Конференциядә район башлыгы Разиф Кәримов, район башлыгы урынбасары Валерий Акатьев, район Башкарма комитеты җитәкчесе Илнар Хафизов, ТР Диния нәзарәте рәисе, мөфти Камил хәзрәт Сәмигуллин, ТР Диния нәзарәтенең баш казые Җәлил хәзрәт Фазлыев, Татарстан Президентының Эчке сәясәт мәсьәләләре департаментының дини берләшмәләр буенча идарәсе дәүләт-конфессия багланышлары бүлеге баш киңәшчесе Альберт Дирзизов, филология фәннәре докторлары, академиклар Хатыйп Миңнегулов, Фоат Галимуллин, “Казан утлары” журналының баш мөхәррире, филология фәннәре кандидаты Рөстәм Галиуллин, дин әһелләре, Ялчыгол шәҗәрәсен дәвам итүчеләр, мәгариф һәм мәдәният хезмәткәрләре , тарихчылар катнашты. Фәнни-гамәли конференция «Татар дөньясының күренекле вәкиле” исеме астында узды. Кунаклар Имәнлебаш авылының мәдәниятен һәм көнкүрешен чагылдырган күргәзмәләр белән таныштылар, Ялчыгол хәзрәтнең каберен зиярәт кылдылар. Имәнлебаш авылы мәдәният йортында кунакларны район башлыгы Разиф Кәримов сәламләде. “Таҗетдин Ялчыгол- дистәдән артык гыйльми хезмәт авторы, аның китапларында мөселманча тәрбия, ислам хокукы, тарих һәм медицина буенча белемнәр тупланган. Шунысы әһәмиятле, бу белемнәр бүген дә актуальлеген югалтмый. Галим халыкны мәгърифәтле, әхлаклы итү өчен күп көч куйган, дәвалау белән шөгыльләнгән. Шушындый олуг шәхеснең Зәй җирендә яшәве, аның халкына хезмәт итүе белән без лаеклы горурланабыз”,-диде ул үз чыгышында. Конференциядә Таҗетдин Ялчыгол иҗатының тәрбияви әһәмияте, аның фәнни хезмәтләренең бүгенге көндә дә актуаль булуы һәм аларны киң җәмәгатьчелеккә җиткерү зарурлыгы турында чыгышлар яңгырады. Соңыннан кунаклар авыл мәчетендә күмәкләшеп өйлә намазын укыдылар.