«Зәй шикәре» агрофирмасы көзге бодай суктыруны тәмамлады

«Зәй шикәре» агрофирмасы районда икенчеләрдән булып көзге бодай суктыруны тәмамлады. Әлеге культура агрофирма бүлекчәләрендә 3137 гектар мәйданда игелде, авыл хезмәтчәннәре 12700 тонна икмәк суктырып алдылар, уртача уңыш гектарыннан 40,5 центнер тәшкил итте. Иң югары күрсәткеч «Заман» бүлекчәсендә (җитәкчесе - Агеев Семен Семенович, әйдәүче агроном – Әхмәтҗанов Мөнавир Зәки улы), биредә 625 гектар мәйданның һәр гектарыннан 49,1 центнер уныш алынды. Иң күп ашлык суктыручы комбайчылар: Никандров Михаил Васильевич -764 тонна; Мелихов Олег Мансурович- 629 тонна; Минькин Илья Александрович - 467 тонна; Хаҗиев Рафик Раисович -342 тонна. Урып - җыю эшләре белән беррәттән районыбыз хуҗалыкларында терлек азыгы әзерләү югары темпларда бара. Район буенча 2000 тонна салам, 11000 тонна сенаж, 600 тонна печән әзерләнде. Шулай ук бушаган басуларны туңга сөрү дәвам итә. Бүгенге көнгә әлеге мөһим агротехник чара 2500 гектарда башкарылган. Шулай ук киләсе елга чөгендер чәчеләчәк басуларга ашлама кертелә.