Иске Зәй бистәсендә яңа спорт мәйданчыгы ачылды

Бүген Иске Зәй бистәсенең 1нче мәктәп биләмәсендә универсаль спорт мәйданчыгы ачылды. Биредә баскетбол һәм мини футбол буенча спорт мәйданчыклары бар иде инде. Ә менә яңа сафка баскан 2 мең квадрат метрлы универсаль спорт мәйданчыгы бистә яшьләренә тагын да зуррак мөмкинлекләр ача. Җәен биредә баскетбол, волейбол, мини-футбол, кышын исә хоккей уйнаячаклар. Республикада барлыгы шундый 11 спорт мәйданчыгы төзелә, аның беренчесе Зәйдә ачылды. Мәйданчык президент программасы буенча булдырылды, биләмәсе җирле бюджет хисабына төзекләндерелде. Яңа спорт мәйданчыгын ачуда район башлыгы Разиф Кәримов катнашып, искезәйлеләрнең шатлыгын уртаклашты.