Зәйдә шәһәр ипподромы территориясендә картодром ачылды

Бүген шәһәр ипподромы территориясендә 1700 кв. метр мәйданлы картодром ачылды. Яңа объект юл эшләре муниципаль программасы буенча барлыкка килде. Аны ачу тантанасында Зәй районы башлыгы Разиф Кәримов, ТР Эчке эшләр министрлыгы ЮХИДИ идарәсе башлыгы урынбасары Юрий Ставниченко, “Юл хәрәкәте куркынычсызлыгы” дәүләт бюджет учреждениесе директоры Рифкат Миңнеханов, район башкарма комитеты җитәкчесе Илнар Хафизов катнаштылар. Һәркайсы үз чыгышында картинг белән шөгыльләнүче балаларга иң беренче чиратта иминлек теләде. Бүгенге көндә “Вираж” картинг клубында 20 бала шөгыльләнә, яңа картодром аларның санын арттыру мөмкинлеген ача.