Район башлыгы Разиф Кәримов авыл хуҗалыгындагы эшләрнең барышы белән танышты

Бүген район башлыгы Разиф Кәримов районыбыз хуҗалыкларына урып- җыю эшләренең барышы белән танышырга чыкты. Район буенча барлыгы 61 комбайн эшли, бүгенге көнгә 9300 гектар мәйданда көзге культураларны җыеп алуга ирешкәннәр, 38130 тонна ашлык җыеп алынган, уртача уңыш гектарына 41 центнер тәшкил итә. “Зәй” агрофирмасының “Алга” бүлекчәсе районда беренчеләрдән булып көзге культуралар суктыруны тәмамлады, уңышлары да югары- гектарыннан 58,8ц ентнер. Разиф Кәримов басуларда урып- җыю отрядларының югары дәрәҗәдә оештырылган эшен караганнан соң, берничә товарлыклы – сөтчелек фермасында терлекчеләр белән аралашты. Бүгенге көнгә районда тәүлегенә 85,3 тонна сөт җитештерелә, бер сыердан уртача 14,9 кг сөт савыла. Терлекчеләр алдына җитештерелүче продукция күләмен арттыру, механизаторларга исә- басуларда өлгергән мул уңышны кыска срокларда, югалтуларсыз җыеп алу бурычы куелды.