Зәйдә чираттагы аппарат киңәшмәсе узды

Бүген Зәй муниципаль район башлыгы Р. Г. Кәримов катнашындагы аппарат киңәшмәсе күңелле мизгелләрдән башланды. «Россельхозцентр» ФДБУенең Татарстан Республикасы филиалы районара бүлеге башлыгы Зәлия Тәхаутдинова, район авыл хуҗалыгы һәм азык- төлек идарәсе җитештерү – маркетинг бүлеге киңәшчесе Марсель Рәхмәтов һәм баш белгеч Рөстәм Мәүләвиев республикада урып-җыю эшләрен оештыру, 2018 елгы уракны уздыру тактикасы, көзге культуралар чәчү, туфрак эшкәртү һәм орлык салу мәсьәләләре буенча зона семинар – киңәшмәсен югары дәрәҗәдә оештырган өчен район башлыгы Мактау кәгазе белән бүләкләнделәр. Аппарат киңәшмәсе көн тәртибенә 5 сорау кертелгән иде: райондагы оператив хәл турында, янгын куркынычсызлыгын тәэмин итү, авыл хуҗалыгы буенча мәгълүмат, Зәй муниципаль районы Башкарма комитеты муниципаль заказ бүлегенең 2018нче елның 1 яртыеллыгына эш нәтиҗәләре һәм Александр Бистәсе авыл җирлегенең 2018нче елның 1 яртыеллыгында башкарган эшләре һәм елның калган чорына бурычлары. Район башлыгы контролендә Никифоров урамы, 71 нче йортын торгызу, районның экологик хәле, электрон хезмәткә яраксызлык кәгазьләрен тутыру мәсьәләләре кала. Киңәшмәгә йомгак ясап, район башлыгы Разиф Кәримов катнашучыларга актив һәм нәтиҗәле эш атнасы теләде.