Район башлыгы Разиф Кәримов Зәй эчке эшләр бүлегенең йомгаклау утырышында катнашты

Зәй эчке эшләр бүлегендә агымдагы елның 6 ае нәтиҗәләре буенча утырыш үтте. Аның эшендә район башлыгы Разиф Кәримов, районның хокук саклау органнары хезмәтләре җитәкчеләре, эчке эшләр бүлеге хезмәткәрләре катнашты. Бу ярты елда эчке эшләр бүлеге эшчәнлеге уңай бәяләнә. Бүлек башлыгы Айдар Фәсхетдинов белдерүенчә, теркәлгән җинаятьләр саны быел узган елның шушы чоры белән чагыштырганда 14,4 процентка кимегән (узган ел 278 булса, быел 238). Аеруча урланган әйберләрне табып, хуҗаларына кире кайтару юнәлешендә уңай нәтиҗәләр күзәтелә. Бу юнәлештә Зәй полиция хезмәткәрләре республикада беренче урынга чыккан. Зыян күрүчеләргә китерелгән 9 миллион 247 мең сум матди зыян кире кайтарылган, узган ел бу сан 1 миллион 395 мең сум булган. Шулай ук авыр, аеруча авыр җинаятьләрне ачу, аерым төркемнәр тарафыннан кылынган хокук бозуларны ачыклау буенча да Зәй полициясе икенче урында. Утырыш барышында аеруча нәтиҗәле эшләгән бертөркем хезмәткәр район башлыгы һәм эчке эшләр бүлеге Рәхмәт хатларына ия булды. Озак еллар балигъ булмаганнар бүлекчәсендә эшләгән полиция майоры Гөлфия Бутакованы тантаналы төстә лаеклы ялга озату оештырылды. Аңа нәтиҗәле хезмәте өчен Рәхмәт белдерелде.