Зәйдә өлкәннәр өчен районның истәлекле урыннарына экскурсия оештырылды

Зәйдә ветераннар өчен ел саен төрле чаралар, экскурсияләр оештырыла. Аларны оештыруда башлап йөрүчеләрнең берсе - “Мефро уилз Руссия – Зәй заводы” ветераннар советы рәисе Илдус Ибраһимов. “Тарихи хәтер” проекты кысаларында районның истәлекле урыннары һәм мәчетләргә “Мирас” дип аталган автобус экскурсиясе нәкъ аның башлангычы белән оештырылды. Өлкәннәр “Нур” мәчетендә, Мирный бистәсендәге “Тынычлык” мәчетендә, Имәнлебаш авылы зиратында дин әһеле, тарихчы, язучы Таҗетдин Ялчыгол каберендә, авыл мәчетендә булдылар. Иске Зәйнең яңа “Билал” мәчете дә экскурсия маршрутына кертелгән иде. Биредә сәяхәтчеләр мәчет имамы Илсур хәзрәт белән бергә өйлә намазын укыдылар, аннан соң Таҗетдин Ялчыгол музеен карадылар. Традиция буенча экскурсия туган як тарихын өйрәнү музеенда төгәлләнде.