Район башлыгы Разиф Кәримов Татарстан Республикасы Хөкүмәте йортында узган киңәшмәдә чыгыш ясады

7 июль көнне Татарстан Республикасы Президенты Рөстәм Миңнеханов ТР Министрлар Кабинетында торак, социаль-мәдәни объектлар, агросәнәгать комплексы, шулай ук урта һәм кече эшмәкәрлекне үстерү мәсьәләләре буенча видеоконференция режимында чираттагы киңәшмә үткәрде. Төп докладчылардан соң киңәшмәдә Зәй районы башлыгы Разиф Кәримов чыгыш ясады. Ул чыгышын районда урта һәм кече эшмәкәрлек торышын анализлаудан башлады. Районда 1516 урта һәм кече эшмәкәрлек субъекты теркәлгән, шул исәптән 351 кече предприятие һәм 1165 – шәхси эшмәкәр. Ел дәвамында аларның саны 46га арткан. Кече бизнес структурасында 2159 кеше хезмәт куя. Урта һәм кече эшмәкәрлекнең икътисадтагы өлеше – 26,9 процент. Район башлыгы шулай ук “Заман” сәнәгать комплексы төзелешенә дә тукталды. Әлеге проектны гамәлгә ашыра башлаганнан бирле 1462 миллион сум инвестицияләр җәлеп ителгән. Иске Зәй бистәсендә һәркайсының мәйданы 2 гектар тәшкил итүче ике мәйданчык әзерләнә. Аның берсе элекке юл төзү-төзекләндерү идарәсе базасында комбайннар һәм башка авыл хуҗалыгы техникасын ремонтлау һәм запас частьләр эшләү буенча “Зәйагротрейд” һәм элекке “Су каналы” базасында металл корылмалар җитештерү буенча “Интерстрой” ҖЧШ эшли башлады. Разиф Кәримов чыгышында районда туризмны үстерүгә юнәлдерелгән планнар турында да әйтте.