Зәй балалары гаилә кыйммәтләре турында белә

8 июльдә матур бәйрәм – Гаилә, мәхәббәт һәм тугрылык көне билгеләп үтелә. Бу бәйрәм ничек барлыкка килгән һәм ул ни өчен дәүләтебез һәм кешеләр өчен мөһим? Зәй туган як тарихын өйрәнү музее хезмәткәрләре Гаилә, мәхәббәт һәм тугрылык көне уңаеннан “Бердәм Россия” сәяси партиясенең “Ныклы гаилә” проекты кысаларында “Гаилә көне” дип исемләнгән танып белү чарасы оештырды. Аңа “Каенкай” бакчасының уртанчы төркеменә йөрүче балалар тәрбиячеләре Ольга Ивановна Сергеева белән килделәр. Россиядә Гаилә, мәхәббәт һәм тугрылык көне 2008 елдан билгеләп үтелә. Христиан динендә бу көн гаиләне һәм мәхәббәтне саклаучы дип ышанылган изгеләр Петр һәм Феврония көне буларак билгеле. Бу изгеләр Владимир өлкәсенең Муром шәһәрендә җирләнгән, шуңа күрә Муромның үзендә 8 июльне гаилә һәм мәхәббәт көне итеп бәйрәм итү традициясе күптәннән барлыкка килгән. Бәйрәмнең билгесе итеп ромашка чәчәге сайланган. Әлеге көннең символы дип саналган ромашка чәчәге балалар янына кунакка килде һәм алар белән төрле уеннар уздырды. Балалар рәхәтләнеп уеннарда катнаштылар, бәхетле гаиләләр яшәр өчен йорт “төзеделәр”, “Бәхетле гаилә” сынын ясадылар. Балаларның шат авазы чарада катнашучыларга күтәренке кәеф бүләк итте.