Район башлыгы Разиф Кәримов шәһәр предприятиеләре эшчәнлеге белән танышты

Бүген район башлыгы Разиф Кәримов үзенең эш көнен шәһәр предприятиеләре эшчәнлеге белән танышудан башлады. Зәй йөзен билгеләүче электр станциясе, “Мефро уилз Руссия - Зәй заводы” һәм “ТатЭК” ҖЧШләрендә булды, аларның һәркайсында предприятие җитәкчеләре белән очрашып, җитештерү цехларында эш барышы белән танышты. ГРЭСта Разиф Галиевич төп идарә итү үзәгендә булды. Бүгенге көндә станция штат режимында эшли, энергия җитештерүдә 8 энергоблок эшкә җигелгән. Шунысы игътибарга лаек, Зәй энергетиклары быелның 6 ай нәтиҗәләре буенча энергия җитештерүне 16 процентка арттыра алган, акчага күчереп исәпләгәндә ул - 22 процент. -ГРЭС эшчәнлегендә уңай динамика күзәтелүе безне сөендерә, чөнки станция Зәй өчен бик тә мөһим. Әлеге мәсьәлә Татарстан Президенты Рөстәм Миңнеханов контролендә тора, - диде район башлыгы.