Зәйдә “Ялкын” хәрби- патриотик клубы ачылды
Казан урамы 8нче йортның беренче катында элек башка максатларда файдаланылган 385 квадрат метр мәйдан клуб өчен капиталь төзекләндерелде. Әлеге объектны ремонтлауга республика бюджетыннан 4 миллион сум , җиһазлауга – өстәмә 400 мең сум акча бүлеп бирелде. Бинаның керү өлешен төзекләндерүгә җирле бюджеттан 360 мең акча тотылган. ”Ялкын” шәһәрдәге хәрби-патриотик клубларның үзәгенә әвереләчәк, “Гвардия”, “Боец” һәм “Дружина” клублары да шушы бинага күчте. Биредә хәрби-патриотик юнәлештә эш җәелдерү өчен барлык шартлар тудырылган: шөгыльләр өчен бүлмәләр, уен һәм спорт өчен дә заллар бар. Зәй эзтабарлары отрядларының сугыш эзләре буйлап йөреп алып кайткан табылдык- экспонатлары да хәзер “Ялкын”да махсус музейда җыела. Клубны ачу тантанасында район башлыгы Разиф Кәримов, башкарма комитет җитәкчесе Илнар Хафизов катнашты. Разиф Галиевич чыгышында соңгы 3-4 елда шәһәр-районда әлеге төр объектларны төзекләндерүгә зур игътибар бирелүен, балалар һәм яшьләребезгә шөгыльләнү өчен шартларның елдан-ел яхшыра баруын билгеләп үтте, клубка кирәк-яраклар алырга 100 мең сумлык сертификат бүләк итте. Бүгенге көндә шәһәрдә балалар һәм яшьләр өчен яшәү урыны буенча төрле юнәлештәге 11 клуб исәпләнә.