Зәй хезмәтчәннәре терлек азыгы әзерләү темпларын арттыра бара

Районыбыз кырларында эш тынып тормый. Хәзерге вакытта авыл кызу печән өсте мәшәкатьләре белән яши. Механизаторлар күпьеллык үләннәрне чабып, терлек азыгы әзерләү белән мәшгуль. 28 июньгә авыл хуҗалыгы идарәсеннән алынган мәгълүматлар буенча, “Зәй” агрофирмасы 250 тонна печән, 10600 тонна сенаж, “Зәй шикәре” 60 тонна печән, 7500 тонна сенаж, “Восток” 30 тонна печән, 11200 тонна сенаж, “Нива” ҖЧШ 67 тонна печән, 2053 тонна сенаж әзерләүгә ирешкән. Район буенча инде 700 тоннадан артык печән, 30 мең тоннадан артык сенаж әзерләнгән. Шулай ук хуҗалыкларда яшь терлекләр өчен кышкы чорга дару үләннәрен күпләп әзерләү эше дә бара. Агрофирмалар пар җирләренә кош тизәге, известь кертеп эшкәртеп, киләсе ел уңышы турында да кайгырталар. Үсеп килүче үсентеләрне гербицидлар белән эшкәртү дәвам итә. Инде кукуруз, рапс, шикәр чөгендере берничә кат эшкәртелгән, хәзер чөгендер, көнбагыш, кукурузның рәт араларын чүп үләннәрдән арындыру процессы бара.