Зәй делегациясе Алтай Сабантуенда катнашты

Бүген Сабантуй Россиянең 57 төбәгендә һәм дөньяның 30 илендә бәйрәм ителә, Алтай краенда аны 1994 нче елдан бирле үткәреп киләләр. Моңа кадәр Зәй делегациясе башлыча Самара өлкә Сабантуен үткәрешергә йөрсә, быел Татарстан Президенты Рөстәм Нургали улы Миңнеханов, безнең районга тирән ышанычын белдереп, Алтай Сабантуена баруны йөкләде. Район башлыгы Разиф Кәримов җитәкчелегендәге 130 кешедән торган делегация составына районыбызның иң оста спортчылары һәм мәдәният хезмәткәрләре керде. Зәйлеләр анда алтай осталарының гамәли- сәнгать әсәрләре күргәзмәсе белән беррәттән татар милли ихатасын тәкъдим иттеләр. Татарстан Президенты Рөстәм Миңнеханов зәйлеләр иҗатын Алтай өлкәсе Хөкүмәте башлыгы –вакытлыча Губернатор вазифаларын башкаручы Виктор Томенко һәм Алтай Республикасы Башлыгы Александр Бердников белән бергә карады. Районыбызның иң көчле көрәшчеләре алтайлыларга татарча көрәш алымнарын, гер күтәрүчеләр – үз осталыкларын күрсәтте. Җыр һәм бию ансамбльләребез дәртле чыгышлары белән Алтайда яшәүче милләттәшләребезгә онытылмаслык тәэсирләр бүләк иттеләр.