Зәйдә районның элеккеге башлыгы Ринат Фәрдиевне искә алдылар

Искә алу чарасы Ринат Фәрдиев исемен йөрткән паркта, истәлек билгесе янында уздырылды. Биредә аның туганнары, якыннары, фикердәшләре, төрле елларда бергә эшләгән хезмәттәшләре, район хакимияте вәкилләре җыелды. Ринат Фәрдиев 30 ел гомерен Зәй районы үсешенә бирде, үзенең яшәү рәвеше, тормышны, кешеләрне яратуы белән күпләргә үрнәк булырлык шәхес иде, хезмәт кешесен хөрмәтли белүче җитәкче буларак үзе дә зәйлеләрнең тирән ихтирамын казанды. Аның турында җылы хатирәләре белән район башлыгы Разиф Кәримов, “Татмедиа” АҖнең “Зәй-информ” филиалы җитәкчесе Венера Исрафилова, Ринат Фәрдиев исемен йөртүче татар гимназиясе директоры Ленар Әхмәтҗановлар уртаклашты. Флейта һәм гармунда уйнаучылар башкаруында Ринат Фәрдиевнең яраткан көйләре яңгырады. Зәйлеләр аның башлангычы белән булдырылган ял паркында куелган истәлек билгесенә чәчәкләр салып, тагын бер тапкыр әлеге олуг шәхесне онытмауларын расладылар.