Зәй мәчетләрендә Ураза гаете зурлап билгеләп үтелде

Бүген барча мөэмин-мөселманнар ислам динендәге иң мөбарәк бәйрәмнәрнең берсе - Ураза гаетен бәйрәм итә. Рамазан ае буе иртән кояш чыгарга ике сәгать кала сәхәр ашап, кич кояш баегач авыз ачып, ризыкның, суның кадерен белергә, гайбәтләрдән, начар гамәлләрдән, нәфестән тыелырга, мөмкин кадәр күбрәк игелек кылырга өйрәнде, үзләрендә сабырлык, миһербанлылык, шәфкатьлелек сыйфатларын тәрбияләде ураза тотучылар. Районыбызның барлык мәчетләрендә иртәнге намаздан соң бәйрәм намазлары укылды, бәйрәмгә җыелган мөслим- мөслимәләр вәгазь, коръән аятьләре тыңлап, калебләрен сафландырдылар. Таҗетдин Ялчыгол исемендәге үзәк мәчеттә ай буе ураза тоткан кардәшләребезне изге бәйрәм белән район башлыгы Разиф Кәримов, район имам- мөхтәсибе Фатыйх хәзрәт Нуруллин, Төркиядән килгән Коръән- хафиз Абдулла хәзрәт Баяр тәбрикләделәр. Үзенең саллы, җаннарга үтеп керерлек үгет- нәсыйхәт сүзләрен мөхтәсибәт каршындагы Аксакаллар шурасы рәисе Сәгыйть хәзрәт Камалов җиткерде. Җәмәгать белән гает намазын укыганнан соң, мөселман кардәшләребез кайнар пылау белән чәйдән авыз иттеләр.