Зәйлеләр Россия көнен зур концерт программасы белән билгеләп үттеләр

Бүген Ринат Фәрдиев исемендәге ял паркында “Алга, Россия!” дип исемләнгән зур бәйрәм чарасы узды. Зәйлеләрне һәм шәһәребез кунакларын Россия көне белән район башлыгы Разиф Кәримов тәбрикләде: “Әлеге дәүләт бәйрәме илебезнең көчен һәм бердәмлеген гәүдәләндерә. Россия Федерациясе Президенты тарафыннан россиялеләрнең тормыш дәрәҗәсен яхшыртуга, илнең халыкара абруен ныгытуга юнәлдерелгән стратегик курс илебез халкы тарафыннан киң яклау тапты. Моның алга таба да шулай булачагына ышанам. Ватанпәрвәрлек һәм гражданлык традицияләренә тугрылыкны, күп милләтле халкыбызны ныгытучы кыйммәтләрне саклап, үзләренең рухи бердәмлеге һәм Ватаныбыз өчен горурлану хисләре белән берләшкән зәйлеләр районыбыз, республикабыз, илебезнең үсеше өчен мөмкин булганның барсын да эшлиләр. Без алдыбызга куйган максатларга ирешербез, барлык сынауларны да җиңеп чыгарбыз дип ышанам”,- диде ул үз чыгышында. Бәйрәм программасы “Энергетик” мәдәният сарае иҗат коллективлары, яшьләр эшләре һәм спорт идарәләре тырышлыгы белән әзерләнде. “Мирас”, «Презент», «Магия», «Импульс», «Русская душа», «Ладушки» коллективлары, Нина Шатрилова, Динара Сәлахиева, Илдар Гыйльметдинов, Фәннур Миннекәевләр башкаруында илебезнең көченә багышланган, патриотик рухтагы җырлар яңгырады. “Барс” футбол командасы спорт композициясе, волонтерлар- музыкаль флэшмоб күрсәтте. Балалар өчен күңелле уен һәм бәйгеләр оештырылды.