Район Башкарма комитеты җитәкчесе И.Ф. Хафизов соңгы кыңгырау бәйрәме белән котлады

Бүген шәһәр-районыбызда ХI һәм IX сыйныфларны тәмамлаучылар өчен соңгы кыңгырау чыңлады. Әлеге уңайдан барлык мәктәпләрдә тантаналы чаралар үтте. Бәйрәм уңаеннан 6 нчы мәктәптә үткән тантанада катнашучыларны район башлыгы Разиф Кәримов исеменнән район Башкарма комитеты җитәкчесе И.Ф. Хафизов котлады. Ул алар арасында Россиякүләм бәйгеләрдә, республика олимпиадаларында катнашып, район данын яклаучыларның күп булуын билгеләп үтте. Үзләре сайлаган уку йортларын уңышлы гына тәмамлап, яхшы белгечләр булып, туган төбәкләренә яңадан әйләнеп кайтуларын теләде. Укучыларга төпле белем һәм тәрбия биргән, аларны олы юлга чыгаруга зур көч куйган укытучыларга, ата-аналарга үзенең хөрмәтен белдерде һәм ихлас күңелдән рәхмәтләрен җиткерде. Соңгы кыңгырау, соңгы чыңлау, кабатланмас хатирәләр, дулкынландыргыч мизгелләр булып һәркемнең күңел түрендә озак сакланыр.