Зәй үзәк китапханәсендә җирле шагыйрь Мәслах Кашаповның “Моңга сусаган Сармашым” дип исемләнгән китабын тәкъдим итү булды

Зәй үзәк китапханәсендә җирле шагыйрь Мәслах Кашаповның “Моңга сусаган Сармашым” дип исемләнгән китабын тәкъдим итү булды. Моннан ун элек аның “Нәсел агачым” дип исемләнгән шигырьләр җыентыгы дөнья күргән иде. Соңгы басмасы туган авылы тарихы, аның халкы, күренеклеләре, данлы көрәшчеләре, әби-бабалары, сугыш кырларында ятып калган туганнары турында язмалар, нәсел шәҗәрәсе, туган як, авыл, табигать, тел турында лирик һәм фәлсәфи шигырьләре урын алган. Автор басманы әзерләү өчен төрле архивларга мөрәҗәгать итә, тарихи язмалар барлый, шактый авылдашлар белән күрешеп-очраша. Алты ел тынгысыз эзләнүләрдән соң 500 тираж белән әлеге басма дөнья күрә. Китап укучыларда зур кызыксыну уятты, алар чарада басма турында фикерләрен әйтеп, автор шигырьләрен укыдылар. Мәдәни чарада авторның сүзләренә язылган җырлары да башкарылды. Мәслах Кашапов Тукай иҗатын үз итә, халкыбызның бөек шагыйре тууының 125 еллыгы уңаеннан Яңа шәһәрдә миләш агачлары үсентеләре алып кайтып утыртып, Тукай скверы булдырды. Ул аны гаиләсе белән карап тотып, ел да яңа үсентеләр белән тулыландыра. Игелекле эш башында торучы шәһәрдәшебез шигырьләрен тал чыбыктан кәрҗиннәр үрә-үрә яза, тальян гармунда, курайда уйный. Район мәдәният, китапханә чараларында актив катнаша, автоклуб белән авылларга чыгып, укучылар белән очрашуларда чыгыш ясый, аларга курай моңнарын бүләк итә. Чарада үзәк китапханәнең балалар эше буенча директор урынбасары Рита Әхмәтова, автоклуб мөдире Сиринә Хөснетдинова катнашып, чыгышларында шагыйрьнең күпкырлы шәхес булуын, игелекле эш-гамәлләр кылуын, иҗаты белән чараларга үзенчәлек өстәве, урыннарга чыгып очрашуларда аша яшь буында телгә, әдәбиятыбыз, мәдәниятебезгә мәхәббәт тәрбияләве турында ассызыкладылар. Сиринә Хөснетдинованың моңлы җырлары исә чарага үзенчәлек, аерым мәгънә өстәде. Чараны җылы һәм матур итеп татар әдәбияты бүлеге китапханәчеләре Венера Галимова белән Эльвира алып барды.