Пәнәчедә җирлек башлыклары киңәште

Зәйдә җирлек Советлары утырышларын урыннарга чыгып үткәрү 2016 нчы елда гамәлгә кертелгән иде. Шуннан бирле 22 авыл җирлегенең 16сы эш тәҗрибәсе белән уртаклашырга өлгерде. Чираттагы 17нче утырыш Югары Пәнәче җирлегендә узды. Аның эшендә район башлыгы урынбасары Валерий Акатьев белән район башкарма комитеты җитәкчесе Илнар Хафизов катнашты. Утырыш алдыннан кунаклар Түбән, Урта Пәнәче авылларында кошчылык юнәлешендә эшчәнлек алып баручы Фәнис Миңнеханов, Альберт Маракин, Альберт Шакиров фермаларында, яшелчәләр һәм чәчәк үсентеләре үстерүче Рамис Әльмиев хуҗалыгында булдылар, үзара салым һәм грант акчаларына куелган яңа су скважинасын, Югары Пәнәче башлангыч мәктәбен карадылар. Күчмә утырышның пленар өлеше авыл клубында узды. Анда Югары Пәнәче җирлеге җирле үзидарә органнары эшчәнлеге һәм 2018 нче елга бурычлары, муниципаль милекне рәсмиләштерү, су белән тәэмин итү һәм аның өчен түләү, авыл җирлекләрендә санитар икеайлык нәтиҗәләре һ.б мәсьәләләр каралды. Йомгаклау сүзе белән Илнар Хафизов чыкты.Югары Пәнәче җирлеге эшчәнлеге уңай яктан бәяләнде. Җирлек башлыклары алдында 2018 нче елга үзара салым программасын гамәлгә ашыру, торак пунктларны санитар чистарту һәм төзекләндерү икеайлыгы кысаларында эшне дәвам итү, янгын куркынычсызлыгын тәэмин итү һ.б. бурычлар тора.