Халыкара гаилә көне уңаеннан хәйрия акциясе

Гаилә гомер - гомергә яшәешнең башлангычы булды. Ул – кешенең төп терәге, җәмгыятьнең рухи сәламәтлеге чыганагы. Гаилә – ул җылылык, мәхәббәт, ышаныч учагы. Аның төп бурычы – балалар үстерү, аларга лаеклы белем бирү, тормышта үз юлларын табарга өйрәтү. Нәкъ менә гаиләдә бала шәфкатьлелек, намуслылык, хезмәт һәм патриотик тәрбиянең беренче сабакларын ала. Шушы бәйрәм уңаеннан Зәй муниципаль районының “Шатлык” Комплекслы халыкка социаль ярдәм күрсәтү үзәгенең гаилә һәм балалар белән эшләү бүлеге белгечләре башлангычы белән «Ljunge bar Loft» кафесы директоры Набиуллина Наталья Владимировна шәһәребездә 5 бала тәрбияләүче Плугиннар гаиләсе өчен хәйрия төшке ашы оештырды. Кунакларны кафе хезмәткәрләре ачык йөз белән каршы алдылар.Меню кечкенәләр өчен дә, зурлар өчен дә туры китереп сайланган иде, ул һәркайсының да күңеленә хуш килде. Күчтәнәчкә дип әзерләнгән сок , йогурт һәм башка ризыклардан торган җыелма балаларны аеруча сөендерде. Шәһәребездә шушындый игътибарлы иганәчеләрнең булуы бик куанычлы хәл, аларга бик зур рәхмәт!