Район башлыгы Р.Г. Кәримов Бөек Җиңү көне белән тәбрикли

Кадерле ветераннар һәм тыл хезмәтчәннәре! Хөрмәтле зәйлеләр! Сезне чын күңелдән Бөек Ватан сугышында Җиңүнең 73 еллыгы белән котлыйм. Илебездә Бөек Ватан сугышы афәте кагылмаган бер генә йорт, бер генә гаилә бар микән?! Бүген Җиңү бәйрәме якынлашкан көннәрдә һәркем ниндидер бер дулкынлану хисе кичерә. Безнең һәркайсыбыз тетрәнү, күз яшьләре белән бу бәйрәмне каршылый, Ватан өчен яу кырында башларын салганнарны искә ала. Бөек Ватан сугышы елларында 11 меңнән артык зәйле фронтка киткән, шуларның 7410сына туган якларына әйләнеп кайту насыйп булмый. Ветераннарыбызның сафы сирәгәеп бара. Бөек Җиңүнең 73 еллыгын барлыгы 24 сугышта катнашучы каршы ала. Без аларны кайгыртырга, хөрмәт һәм игътибар күрсәтергә бурычлы, тыл хезмәтчәннәрен, сугышта катнашучыларның тол хатыннарын, гомумән, Җиңү таңын якынайтуга үзеннән өлеш керткән һәркем зурлауга лаек. Безнең бурычыбыз - солдатларыбыз-җиңүчеләр яулап алган тыныч, имин тормышны саклау, әлеге бәйрәмнең ватанпәрвәрлек әһәмиятен югалтмау. Сезгә чын йөрәктән ныклы сәламәтлек, күңел тынычлыгы, гаилә иминлеге, балаларыгыз, оныкларыгыз һәм оныкчыкларыгызга шатланып яшәвегезне телим! Язгы кояш җылысы сезгә бәйрәм кәефе бүләк итсен, ә якыннарыгызның мәхәббәте һәм кайгыртуы йөрәкләрегезне җылытсын. Бәйрәм белән, кадерле ветераннар! Бөек Җиңү көне белән!