Зәйнең Р.Фәрдиев исемендәге ял паркында быелгы иҗат сезоны музыкаль фонтан белән ачылды

Зәйлеләр яратып йөри торган ял паркында ачык һавада инде традициягә әйләнгән язгы-җәйге иҗат сезонына быел музыкаль фонтан сибелеше белән старт бирелде. Ринат Фәрдиев паркының икенче өлешендә узган елның августында ачылган музыкаль фонтан быел 30 апрель көнне беренче мәртәбә күккә сибелде. Зәй яшьләренең матур, күмәк биюенә кушылгандай, төрле төсләргә кереп, дәртле музыка астында тирбәлеп уйнаучы су тамчылары күңелләрне күтәрде. Үзенчәлекле чарага шәһәрдәшләребез шактый җыелган иде. Музыкаль фонтан ял паркында ачык һавадагы җәйге чараларга әнә шулай старт бирде. - Матур шәһәребездә, матур эшләребез, сәламәт яшәү рәвешебез белән үрнәк булып яшик, ял паркыбыз, фонтаныбыз һәрчак яраткан урыныбыз булсын, - диде үз чыгышында район башкарма комитеты җитәкчесенең социаль мәсьәләләр буенча урынбасары Александр Чапков.