Зәйдә хуҗалыклар кыр эшләренә ныклы әзерлекле

12 нче апрельдә район башлыгы Разиф Кәримов, ТР авыл хуҗалыгы һәм азык-төлек министры урынбасары Тәлгать Таһирҗанов, «Агрокөч-Төркем» ЯАҖ генераль директоры Фәнис Газетдинов, «Агрокөч» АҖ холдингы генераль директоры урынбасары Владимир Егоров, авыл хуҗалыгы һәм азык-төлек идарәсе җитәкчелеге һәм белгечләре катнашында техникаларның барлык системалары каралды. Эш барышында тормоздан башлап идарә итү механизмнары, сигнал бирү төзеклеге тикшерелде, машина-трактор паркы, хезмәтне саклау һәм орлыклык материал һ.б.лар торышы күздән кичерелде. Гомумән, әлеге уңайдан эшчәнлек 40 балл системасы буенча бәяләнде. “Язгы кыр эшләренә, елдагыча, район техника, машина-трактор парклары ныклы әзерлекле. Быел да зәйлеләр мөһим кампанияне бик яхшы әзерләнеп каршылый. Машина-трактор паркларының яңа заманча куәтле техникалар белән тәэмин ителеше дә куандыра”-диде Татарстан Республикасы авыл хуҗалыгы һәм азык-төлек министры урынбасары Тәлгать Таһирҗанов зәйлеләрнең эшенә бәя биреп. Бүген район башлыгы Р.Г. Кәримов, механизаторлар алдында хисап тотып, район буенча тупланган орлыклык, ягулык-майлау материаллары, ашлама, яңа техникалар белән тәэмин ителеш, көзге культураларны тукландыру буенча мәгълүмат бирде, стимуллаштыру максатыннан кызыксындыру чараларын бәян итте. Чәчү эшләрен берьюлы алып барып, бу чорда бердәм эшләү, кыскасы, узган елгы уңыш күрсәткечләрен быел да кабатлау кирәклеген ассызыклады. Аның чыгышын Фәнис Газетдинов, Владимир Егоров, авыл хуҗалыгы идарәсе башлыгы Атлас Галиәхмәтов, “Зәй шикәре” агрофирмасы директоры Фоат Камалиев тулыландырды. Язгы кыр эшләре – үтә мөһим чор, аны борчуларсыз һәм имин, вакытында һәм сыйфатлы башкарырга язсын.