Политехник көллияттә Мәүлид бәйрәме

13 нче декабрь көнне Зәй политехник көллиятендә Мәүлид бәйрәме билгеләп үтелде. Рабигүл әүвәл аеның 12 нче көне — Ислам дөньясында зур тантана көне, бөтен дөнья мөселманнарының зур бәйрәме. Бу көнне сөекле Пәйгамбәребез Мөхәммәд Мостафа салләллаһү гәләйһи вә сәлләм дөньяга килгән. Шул көннән башлап Ислам нуры җәелгән. Аллаһы Тәгалә аңа пәйгамбәрлек биргән, Коръән иңдергән. Зәйдә Мәүлид бәйрәме өченче ел рәттән зурлап, район күләмендә үткәрелде. Бәйрәм күмәкләшеп ястү намазын һәм Коръән укудан башланды. Актлар залында мөселманнарны район башлыгы Разиф Кәримов, ТР Мөфтиенең беренче урынбасары Рөстәм хәзрәт Вәлиуллин, район имам- мөхтәсибе Фатыйх хәзрәт Нуруллин сәламләделәр. Автор- башкаручы Илгиз Шәйхеразиев мөнәҗәтләр, салаватлар әйтте. Районыбыз үзешчәннәре, балалар чыгышы бәйрәмгә ямь өстәде. Мөселманнар арасында лотерея билетлары уйнатылды.