Зәйдә Ак торналар көнен билгеләп үттеләр

2025 елның 22 октябрендә бөтен Россия «Ак торналар» көнен үткәрә. Бу көн рухилык, шигърият бәйрәме һәм барлык сугыш кырларында һәлак булганнар турында якты истәлек буларак билгеләп үтелә. Бу көнне С.Рәфыйков исемендәге Үзәк китапханә хезмәткәрләре 4 нче мәктәпнең 6нчы сыйныф укучылары өчен «Ак торналар чакыруы» дигән әдәби-патриотик сәгать үткәрделәр. Бу бәйрәм Россиянең күпмилләтле халыклары арасында дуслыкны ныгытуга, мәдәниятләрнең үзара үтеп керүенә һәм аңлауга ярдәм итәргә тиеш. Китапханәчеләр катнашучыларны Дагыстанның халык шагыйре Рәсүл Гамзатов инициативасы белән оештырылган Ак торналар бәйрәме тарихы белән таныштырдылар. Бөтен дөньяда торналар образы сугыш фаҗигасе символы булып тора, ә Р.Гамзатов шигыренә язылган «Торналар» җыры барлык сугышларда һәлак булганнар истәлегенә гимнга әверелде. Кунаклар шулай ук шагыйрьне «Торналар» шигырен язарга нәрсә этәргәнен белделәр. Балалар Хиросима фаҗигасе турында: 1945 елның 6 августында америкалылар Япон халкына коточкыч корал-атом бомбасы кулланып көчле һөҗүм ясавын белделәр. Меңләгән кеше, шул исәптән балалар да нурланыш авыруының корбаннары булды. Балалар кан рагы белән авырган Садако Сасаки исемле кыз тарихын ишеттеләр. Япон риваяте: кем дә кем 1000 кәгазь торна җыя, шуның теләге чынга ашачагы турында белделәр. Шулай ук Бөек Ватан сугышын, Әфган, Чечен сугышын, Чернобыль һәлакәтен һәм күп кешеләрнең гомерен өзгән башка фаҗигале вакыйгаларны искә төшерделәр. Шулай ук планетаның төрле почмакларында торналарга куелган һәйкәлләр турында сөйләделәр. Укучылар Рәсүл Гамзатовның «Торналар» шигыренә багышланган плакат ясадылар. Чара дәвамында шигырьләр яңгырады, катнашучылар «Летят журавли» кинофильмыннан кадрлар карадылар һәм «Журавли» җырын тыңладылар.