Зәйдә район һәм шәһәр Башкарма комитеты җитәкчеләре сайланды

Бүген хакимият бинасының зур залында бишенче чакырылыш Зәй муниципаль районы һәм Зәй шәһәре Советларының икенче утырышы узды. Утырышны район һәм шәһәр Советлары рәисе Р.Г. Кәримов алып барды Көн тәртибендәге төп мәсьәләләр район Башкарма комитеты җитәкчесе һәм Зәй шәһәре Башкарма комитеты җитәкчесе вазыйфаларын биләүгә конкурс нәтиҗәләре турында иде. Район депутатлары ачык тавыш бирү юлы белән бертавыштан Э.Э. Галиев кандидатурасын, шәһәр Советы депутатлары Н.Г. Павлова кандидатурасын хупладылар. Шулай итеп, Эмиль Эдуард улы Галиев район Башкарма комитеты җитәкчесе, Наталья Геннадьевна Павлова шәһәр Башкарма комитеты җитәкчесе итеп сайланды. Утырышта шулай ук район һәм шәһәр Советының даими комиссияләре составлары турындагы мәсьәләләр каралды, даими комиссияләрнең составлары расланды һәм рәисләре сайланды. Утырыш эшендә мәдәни мирас объектларын саклау буенча ТР Комитеты рәисе Иван Гущин, ТР Дәүләт Советы депутаты Рияз Комаров, ТР Рәисенең территорияләр белән эшләү буенча баш киңәшчесе Фәнис Нуриев катнашты.