Зәйдә Р.Ш. Фәрдиев истәлегенә Бөтенроссия көрәш турниры уза

Бүген «Давыдов-Арена» боз сараенда Р.Ш. Фәрдиев истәлегенә көрәш буенча бөтенроссия ярышларын ачу тантанасы булды. Турнир Бөтенроссия статусында җиденче тапкыр уза һәм анда Россия Федерациясенең 4 төбәгеннән, Татарстан Республикасының 25 район һәм шәһәреннән 287 спортчы катнаша. Чара башланыр алдыннан кунаклар Р.Ш. Фәрдиев исемендәге татар гимназиясендә, «Дулкын-Волна» бассейнында, автовокзалда, психологик - педагогик ярдәм үзәгендә булдылар, Фәрдиев исемендәге паркта истәлекле билгегә чәчәкләр салдылар. Ачылу тантанасында район башлыгы Разиф Кәримов, РФ Федераль Җыены Дәүләт Думасы депутаты, ТР татар-башкорт милли спорт көрәше федерациясе рәисе Рөстәм Кәлимуллин, ТР көрәш федерациясе башкарма директоры Марсель Таһиров, җиденче чакырылыш ТР Дәүләт Советы депутаты Рияз Комаров, ТР Спорт министрлыгының Спорт әзерлеге үзәге директоры урынбасары Константин Горбунов, «Сетевая компания» АҖнең Түбән Кама электр челтәрләре филиалы җитәкчесе Эдуард Шаронов, Ринат Фәрдиевнең туганнары, ярышларның баш хөкемдары Рәкыйп Фәйзуллин катнашты. Сәламләү сүзләре бүләкләү тантанасы белән чиратлашып барды. Физик тәрбиянең заманча методикаларын камилләштерүгә керткән шәхси өлеше, шулай ук спортның милли һәм Олимпия төрләрен үстерүдә актив катнашканы өчен Разиф Кәримов РФ Федераль Җыены Дәүләт Думасы депутатының Рәхмәт хаты белән бүләкләнде. Халыкның физик культура һәм спорт белән шөгыльләнүенә шартлар тудыруга керткән өлеше өчен район башлыгы урынбасары Петр Уразайкин Россия көрәше федерациясенең Рәхмәт хаты белән бүләкләнде; Күпьеллык нәтиҗәле хезмәте һәм Татарстан Республикасында көрәшне үстерүгә керткән өлеше өчен Россия көрәш федерациясенең Рәхмәт хаты белән физик культура, спорт һәм туризм идарәсе башлыгы Илзирә Тимеркаева бүләкләнде; Күпьеллык нәтиҗәле хезмәте һәм Татарстан Республикасында көрәш үсешенә керткән өлеше өчен, шулай ук 60 яшьлек юбилее уңаеннан Россия көрәше федерациясенең Рәхмәт хаты "Зәй " спорт мәктәбенең көрәш буенча тренер-укытучысы Илсур Зиатдиновка тапшырылды; Намуслы хезмәте һәм Зәй муниципаль районында көрәшне үстерүгә керткән өлеше өчен «Зәй» спорт мәктәбе директоры Рамил Фаршатовка ТР спорт министрының Рәхмәте белдерелде; Зәй муниципаль районында көрәшне үстерүгә керткән өлеше өчен, шулай ук 65 яшьлек юбилее уңаеннан спорт ветераны Петр Анисимов ТР Көрәш федерациясенең Рәхмәт хаты белән бүләкләнде; Зәй муниципаль районында көрәшне үстерүгә керткән өлеше өчен, шулай ук 60 яшьлек юбилее уңаеннан спорт ветераны Мансур Минһаҗев ТР Көрәш федерациясенең Рәхмәт хаты белән билгеләп үтелде; Р.Ш. Фәрдиев истәлегенә көрәш буенча бөтенроссия ярышларын уздыруда ярдәм иткәне өчен Зәй муниципаль районы Башлыгының Рәхмәт хаты Чаллы шәһәренең «Чаллы» спорт мәктәбе директоры Рөстәм Фәйзрахмановка тапшырылды; Зәй муниципаль районы Башлыгының Рәхмәт хатлары белән шәхси эшмәкәр Ольга Дубровина, «Зәй» спорт мәктәбенең баш хисапчысы Эльвира Кузнецова һәм инструктор-методист Анна Гулюшова бүләкләнде. Ярышлар 2 көн дәвамында узачак. Өлкәннәр-җиде, яшүсмерләр 11 авырлык категориясендә көрәшәчәк. Турнирның ябылу тантанасы иртәгә, 19 октябрьдә, 13 сәгатькә билгеләнгән.