Зәйдә «Минбар» театрының әдәби–музыкаль спектакле күрсәтелде

Бүген 7нче мәктәп базасында талантлы режиссер, композитор һәм автор – башкаручы, Татарстанның атказанган артисты Ильяс Халиков җитәкчелегендә «Минбар» театрының «Аклыкка илтсен юллар» әдәби–музыкаль спектакле күрсәтелде. Тамашачылар районыбыз мәктәпләренең югары сыйныф укучылары, укытучылары һәм балалар бакчасы тәрбиячеләре булды. Чара Татарстан Республикасы Рәисе каршындагы татар телен һәм Татарстан Республикасында яшәүче халыкларның туган телләрен саклау, үстерү комиссиясе ярдәмендә оештырылды. Рольләрне Татарстанның атказанган артисты Ильяс Халиков, Татарстанның атказанган мәдәният хезмәткәрләре Марат Баязитов һәм Зөлфирә Дәүләтшина, «Шаян-ТВ» каналын алып баручы Илназ Сибгатуллин башкардылар. Укучылар мәңгелек кыйммәтләр: әти-әни хакын хаклау, туган җирне ярату, туган нигезне онытмау, аны яшәтү, ана телен белү һәм кадерләү, балалар тәрбиясе, әдәп-әхлак һәм башка бик күп әһәмиятле темаларны күтәргән гаҗәеп тирән мәгънәле чыгыш карады. Район башлыгы һәм Бөтендөнья татар конгрессының җирле бүлеге исеменнән артисларга рәхмәт сүзе белән массакүләм мәгълүмат чаралары белән эшләү бүлеге башлыгы Ә.М. Биккинина, мәгариф идарәсе башлыгы вазифаларын башкаручы М.К.Вәлиәхмәтова чыгыш ясадылар. Мондый тәрбияви чаралар үсеп килүче яшь буынның рухи яктан баюына ярдәм итә һәм милли мәдәният белән бәйләнешен ныгыта.